Ég fæ borgað per vinnuhlutfall í þágu sjúklinga ........ á hvernig samningi er borgarstjórnin???

Síminn minn hringir á öllum tímum sólarhringsins. Stundum hringir hann eftir hádegið, stundum seinni partinn, stundum á kvöldin og mjög oft snemma á morgnana, t.d. klukkan 8:17.... 8:47...... 9:02...... 9.27 ......11:15 og svo framvegis eftir guðs óleyfilegu stígum. Næstum aldrei fæ ég hringingu frá vinum mínum eða fjölskyldu því að þegar maður vinnur svona óreglulegan vinnutíma og hefur gert í mörg ár, þá er það orðin yfirlýst skoðun manns náinna; "við hringjum ekki í þig, því við vitum aldrei hvenær þú ert sofandi eða vakandi..... HRINGD ÞÚ í okkur þegar þú ert vakandi og hefur tíma!!!" ......þess vegna er símareikningur minn ótæpilega hár..... (mér finnst að Landspítalinn ætti að taka þennan lið með í launaútreikning okkar starfsmanna......)

Ókristilegur tími, fyrir mér, fer eftir því hvernig vakt ég VAR að vinna eða eftir því hvernig vakt ég ÉR AÐ FARA að vinna..... þannig er ókristilegur tími sólarhringsins eiginlega alla tíma hringsins í mínu lífi, mismunandi eftir dögum og mánuðum..... annaðhvort er ég sofandi eftir vakt eða að hvíla mig fyrir vakt. Og að sama skapi er oft "kristilegur" tími hjá mér þegar hjá öðrum er ókristilegur.... ég er oft vakandi þegar flestir eru sofandi og næstum engin leið er til þess að fá fasta reglu á svefntíma eða matarvenjur mínar. Það er nákvæmlega ENGIN rútína í mínu lífi nema skóladagar sonar míns, sem ég neyðist til að halda við lýði.... vakandi eða sofandi, eða hálft af hvoru.....

Svona er þessu farið með flest vaktavinnufólk. Annaðhvort erum við vakandi sofandi í einhverjum erindagjörðum eða sofandi vakandi í öðrum.... Engin furða að mínir nánustu hafi fyrir löngu hætt að þora að hringja í mig.....

Þannig er það því, að oftast þegar síminn minn hringir þá sýnir númerabirterinn minn eitthvert stofnananúmerið.... já, gott fólk, það er svo gott sem öll mín innkomandi símtöl núorðið; stofnanasímtöl og svo Mr. K. sem er sá eini sem nokkurnveginn veit hvernig, hvar og hvenær ég er að vinna.... Í yfir 90% af tilfellum byrja númerin á 543..... og þá veit ég að það er símtal frá Landspítalanum. Og líklegra en ekki, þá eru þessi símtöl þess gerðar, að það er verið að biðla til mín um að taka vaktir á einhverri deild..... allavega get ég alveg stólað á það að ekki er verið að hringja frá "yfirbyggingu" spítalans til að bjóða mér betri laun fyrir vel unnin störf.....

Svo undantekningarlaust þá vel ég það, að svara ekki þessum símtölum, þ.e. þegar símtölin eru að vekja mig, sem þau mjög oft eru að gera. Ég nenni ekki að víla og díla um vaktir hálfsofandi og svo er því eiginlega líka þannig farið, að eins og staðan á LSH er núna, þá get ég eiginlega valið um vaktir.... ef ég missi af þessarri deild þá bara býð ég fram þjónustu á næstu.... ef mig vantar pening og þar af leiðandi vakt. Ég get alltaf skapað mér vinnu og valið á milli deilda.

Ég geri mér grein fyrir því að ég hef ákveðið forskot.... ég vann í nokkur ár fyrir einkafyrirtæki sem leigði mig inn á spítalann og því hef ég núna unnið á yfir 15 deildum spítalans reglulega, með þeim tíma sem ég vann á krabbameinsdeild LSH og blóðmeinadeildinni..... svo vann ég á hjúkrunarheimili og á Sjúkrahúsinu Vogi ..... svo ég hef ágætis víðtæka reynslu af hinu og þessu.

Ég get auðveldlega gengið inn á margar deildir spítalans og unnið, ég þekki orðið fólk á næstum öllum deildum spítalans og ég get vel sagt það með vissu, að maður er alls staðar velkominn. Ekki kannski alltaf ÉG sem persóna, en ÉG sem starfskraftur er alls staðar velkomin..... þannig er bara staðan fyrir okkur hjúkrunarfræðinga í dag. Við þurfum alltaf að vinna mikið fyrir laununum okkar en við erum í þeirri stöðu að við getum virkilega haft áhrif á launin okkar..... þ.e. unnið meira til að fá meira, sem er meira en margir geta. Fyrir það er ég svo mikið þakklát.

Þess vegna argast ég ekki út í þessar símhringingar sem ég fæ. Þetta eru atvinnutækifærin mín. Og ég veit að "þau" verða ekki fúl þótt ég svari ekki klukkan 8:47, heldur hringi til baka klukkan 12 þegar ég er alveg vöknuð..... þau eru bara þakklát fyrir að heyra í mér. Enda er ég ekki KOSIN til að vinna fyrir þau, ég er bara eitt af þeirra tækifærum..... ég mæti, sinni ákveðinni vinnu, stimpla mig út og fæ borgað fyrir það sem ég inni af hendi á meðan ég var á staðnum.... ég er ekki fengin þangað til að halda áfram að leysa málin eftir að ég stimpla mig út í lok dags..... nei, þá hefur næsta vakt tekið yfir. Þess vegna eru þrískiptar vaktir í heilbrigðiskerfinu....

Ég fæ borgað fyrir þá tíma sem ég vinn, þá tíma sem ég eyði í sjúklingavinnu á spítalanum...... ég fæ EKKERT borgað fyrir að vera vakin á öllum tímum sólarhringsins, ég fæ EKKERT borgað fyrir að tala í korter við ritarann á taugadeildinni um ýmsar vaktir og ég fæ EKKI HELDUR NEITT borgað fyrir það að plana og víla um alls konar vaktir sem ég ætla að taka á smitsjúkdómadeildinni. Svo af hverju skyldi ég taka símann, nema þegar mér hentar?

Aftur á móti fá borgarfulltrúar okkar greitt fyrir það að vera í vinnu fyrir okkur. Ég er ekki að segja að þau eigi að vera í vinnu 24/7..... en þau skulda okkur að minnsta kosti það, að skýra okkur frá því sem er að gerast í borgarmálunum. Við kusum þau FYRIR okkur en ekki öfugt..... Ef verið er að ræða nýjan meirihluta, nýjan minnihluta, minni nýjanhluta osfrv., þá er það þeirra skylda að upplýsa okkur, okkur sem kusum þau og okkur sem borgum þeirra laun, um hvað er í gangi. Það hlýtur eitthvað meira að vera innifalið í 217.000 kr. mánaðarlaunum Gísla Marteins heldur en tvær fundarsetur. Það er hreinlega hluti af starfi borgarstjórnarinnar að svara fjölmiðlum og nota fjölmiðla til að koma upplýsingum til okkar þegnanna.

Að lauma sér út um brunastiga er eitthvað það lélegasta sem ég hef séð í íslenskri pólitík..... þetta er eitthvað það aumasta..... það mætti halda að þau væru bara þarna fyrir sig sjálf en ekki fyrir borgarbúa sem þó eru að borga launin þeirra. Þetta er eitthvað það lágkúrulegasta sem hægt er að ímynda sér, og þegar maður fær ítrekað fréttir af því að "Þorbjörg Helga svaraði ekki símtölum", eða "Gísli Marteinn tók ekki símann"!, ... "ekki var unnt að ná í borgarstjórann að svo stöddu" ...... osfrv ofrv. þá undrar maður sig::: HVER ER AÐ VINNA FYRIR HVERN??? Þetta fólk skyldi átta sig á því, að við höfum engan áhuga á þeim sem persónum heldur höfum við áhuga á þeim störfum sem þau gegna og hvernig þau inna af hendi þessi störf. Þau þurfa ekki að lauma sér út um einhverjar leynileiðir til að skýla sér fyrir fjölmiðlum eins og þau séu Jennifer Lopes og Tom Cruise.

Ég tek ekki símann minn að eigin vali þegar Landspítalinn herjar á mig, en ég er ekki heldur kjörin þangað til að sinna hjúkrunarerindum mínum, ég geri það í þágu fólksins þegar mér hentar, enda fæ ég ekki borgað nema ég sé á staðnum og fyrir þær stundir sem ég er á staðnum. Ég fæ EKKI borgað fyrir að sitja í símanum.... þótt ég sé að tala við LSH.... í mínum frítíma.

Gísli Marteinn og fleiri, telja sig yfir það hafna að svara þeim sem kusu hann og flokkinn hans, Þorbjörg Helga hagar sér eins og ég geri eftir næturvakt, einfaldlega tekur ekki símann..... common, í umboði hverra ert þú að vinna, kona??? Svaraðu spurningum borgarbúa. Heldurðu að þú sért bara þarna fyrir sjálfa þig??? Villi Vill bara lýgur um sig þveran og endilangan og undrast svo að fólk sé að undrast yfir honum!!! Vilhjálmur minn, hefur þú EITTHVAÐ gert til að ávinna þér traust borgarbúa??? Svar: NEI, EKKERT, þvert á móti, þú hefur átt stærstan þáttinn í því að eyðileggja Sjálfstæðisflokkinn!!. ......Jórunn, hefur þú eitthvað gert annað en að fjasa um sama málefnið í tvö ár, hvað hefur gerst? Þú ert ekki enn búin að ná lendingu með þitt aðalmál??? Hvað ertu búin að vera að gera? Og Kjartan, veistu eitthvað í hvorn fótinn þú átt að stíga??? Það skiptir örugglega engu máli, því að ég veit ekki hvor fóturinn er vitlausari hvort sem er. Júlíus Vífill ER ekki neitt í þessum málum, hvorki er né segir, svo hann skiptir engu máli, hann er bara með á myndunum svo að borgarstjórnarflokkurinn líti út fyrir að vera stærri..... Og ÞÚ, sem ég kaus ekki einu sinni til borgarstjóra en verður það samt..... ég vil ekki sjá þig. HVAR ER LÝÐRÆÐIÐ Í ÞESSU ÖLLU??? ....Ég veit vel að ég er að gleyma einhverjum af strumpunum, en ég get ómögulega munað hverjum..... getur ekki skipt svo miklu máli.....

Þessi hópur er til athlægis. Ég er búin að vera skráð Sjálfstæðismanneskja síðan ég var 17 ára, en ég er búin að segja mig úr flokknum. Ég geri mér grein fyrir því að ég er ekkert úrslitaatkvæði í þessum flokki og það er allt í lagi. Ég vildi bara "make a statement..... " .... þetta er ekki hegðun sem mér finnst í lagi og mér finnst ekki í lagi að forysta Sjálfstæðisflokksins sitji á rassinum og geri nákvæmlega ekki neitt, og láti þennan ömurlega borgarstjórnarflokk rífa fylgi flokksins niður..... svo ég geri það sem ég get.... ég segi mig úr þessum bjánalega flokki. Ég er búin að fá nóg af sirkus. Punktur. Basta.

Athugasemdir

[Þórarinn Þ Gíslason (IP-tala skráð) 21.8.2008 kl. 05:32]

Sæl Lilja.

Mjög athyggliverð grein hjá þér og ættu sem flestir að lesa þennan pistil þinn.Það er ákveðið sjálfstæði að geta og mega tjá sig um hjartans mál og um leið að ráða því sjálf/ur hvar í flokki hver kýs að vera. En því miður eru stjórnmál á okkar kæra landi í" ömurlegu ástandi".Hugsjónir fæða af sér græðgi þegar komið er á vígvöll stjórnmálanna.

Það verður að segjast eins og er.

Takk fyrir inleggið þitt í þjóðar og borgarmálin.

[Jenný Anna Baldursdóttir, 21.8.2008 kl. 08:55]

Brilljant pistill. Hver og einn hefur vægi.

Kveðja inn í daginn.

[Gunna (IP-tala skráð) 21.8.2008 kl. 10:04]

Jiii, hvað það var gott að "heyra" þig svona pústa út. Gæti ekki verið meira sammála þér. Ég reyndi að horfa á fréttirnar í gær, en slökkti eftir 5 mín.

Heldur þetta fólk í alvöru að við séum bara fífl? Ég get t.d alveg skilið fólk sem fer í fjarnám. En "fjarstarf", halló, það hef ég nú bara aldrei heyrt um. Aldrei nokkurn tímann myndi mér detta í hug að fara í nokkra mánaða leyfi bara, án þess að fá neinn til að vinna starfið fyrir mig. Nóg að mæta bara 2svar í mánuði og allt í gúddi bara. Ööööh, er það ekki svoldið að viðurkenna að maður sé ekki að gera NEITT í vinnunni dagsdaglega, og er í raun óþarfur????

Ekkert að því að fara í námsleyfi, hef bara gott um það að segja. En að fá engan fyrir sig á meðan, ja, svo ég leyfi mér að vitna í Mikka ref: "Þetta er það mesta rugl sem ég hef nokkurn tímann heyrt".

Hlakka til að sjá þig um helgina skvíz............og já, það verður BANNAÐ að tala um hagfræði og pólitík:o)

[Sigrún Óskars, 21.8.2008 kl. 19:42]

Frábær pistill. Ég held að allar hjúkkur á LSH séu með símnúmerabirti og svara ekki 543.... númerum nema þær séu í stuði fyrir extravaktir.

[Haraldur Bjarnason, 21.8.2008 kl. 21:13]

Skynsöm stelpa. Tek undir með Jenný Önnu: brilljant pistill.

[Ásdís Sigurðardóttir, 21.8.2008 kl. 21:16]

Virkilega vel skrifaður pistill hjá þér.  Mætti alveg birtast í blöðum líka.  Þetta er sko algjörlega satt allt sem þú segir, en ég reyndar ásaka fleiri en sjálfst.fl. fyrir þessa dellu alla.  Horfi á þetta og fylgist með, en viðurkenni að ég skil varla lengur hvað fólk er að fara.  Bíð spennt eftir framhaldinu.  Það virðist vera einskonar þjóðarsátt hjá ráðamönnum að greiða öllum sem stunda hjúkrunar/umönnunnar/kennslu og allan þann hóp, bara skítalaun. Verð svo reið í hvert skipti sem þetta ber á góma, vildi sjá ærlegt framtak í þessum málum og þá gæti maður kannski farið að trúa á einhverja á ný. Gaman að kynnast þér.

[Jóna Kolbrún Garðarsdóttir, 22.8.2008 kl. 00:28]

Ég er líka búin að fá nóg af pólitíkusum, þeir virðast upp til hópa vera fólk sem nennir ekki að vinna almennilega vinnu, fer í framboð til þess að slappa af á ofurlaunum.  Ruglið í Reykjavík er öllu borgarstjórnarfólkinu að kenna allir flokkarnir hafa tekið þátt í valdabaráttunni og stungið hina í bakið, enginn er undanskilinn.  Ég ætti kannski að fara í framboð með þér, stofna nýjan flokk fólks sem nennir að vinna, vinnuna sína. 

[Guðrún Þorleifs, 22.8.2008 kl. 07:10]

Góð að vanda  

Veit sannarlega ekki hvað er með þetta fólk sem gefur kost á að láta kjósa sig til þessara starfa fyrir borgina. Eitt að einkennum þessa liðs virðist vera minnisleysi á háu stigi eða eftir þörfum. Nú er Samfylkinging búin að gleyma hvernig var þegar I.S. fór í nám á sínum tíma, þá í borgarstjórn.

Eins og ástandið er í borgarmálum þá held ég að allir flokksbundnir borgarbúar gætu sagt sig úr sínum flokki. Engin af þessum flokkum hafa sýnt þá ábyrgð sem fylgir því að vera í stjórn, í minni hluta sem og meiri hluta.

Fusss og svei!!!

Annars bara góð

[Hólmdís Hjartardóttir, 24.8.2008 kl. 02:07]

Ég hef oft sagt að maður ætti að fá borgað fyrir að vera vakin eldsnemma á morgnanna á fríhelgum......

Sammála þér með fólkið sem var kosið til að þjóna okkur.